广州吃货粤语暗号!一开声就知你係咪自己友
中国美食博大精深
每个地方都有自己嘅吃货暗号
广州作为美食之都
呢D暗号肯定多不胜数啦
静静鸡同你讲
喺街搵十个人可能得一个听得明!
▼
先对下code
睇下係咪自己友先!
“靓姐,唔该一碗细蓉加底,
碟头饭加个靓仔唔要例水,
再加多杯肥妹飞冰! 行街啊唔该!”
1
行街
“行街”即系打包拎走嘅意思,当你行入茶餐厅对老世讲“XXXXXX,最后加句行街!”搞掂,係咪好型先~
2
靓仔
好多人学讲粤语,都会学“靓仔”、“靓女”先,用嚟叫人啊嘛~但係暗号所讲嘅靓仔,唔係叫男服务员嘅意思,而係指“白饭”!因为白饭生得青靓白净,白雪雪,所以食货就称佢为靓仔啦~
3
靓女
而靓女就由靓仔衍生出来。又係白白净净好省镜,而且软绵软绵,似足娇滴滴嘅女仔~如果边日肠胃唔舒服,最好整碗“靓女”清下肠胃。
4
OT
0T=柠檬茶,“0”粤语同音“柠”,“T”就係指Tea,加埋柠茶啦~同理,06,“6”粤语同音“乐”,就係柠檬可乐!係咪好似卧底啲暗号呢~
5
肥妹
点解叫肥妹?朱古力+奶茶两样热量杀手加埋一起,仲唔肥啊?减肥期间,千奇唔好乱叫肥妹啦~
6
例水
好多茶餐厅、快餐店买碟头饭都会提供例汤,因为 免费所以都无咩料,好稀好似水咁,所以就叫「例水」。
7
29
29指“热鲜奶”,“2”用粤语同“热”谐音,“9”英文发音“nine”,谐音“奶”,所以就组成咗“热奶”。
8
飞沙走奶
飞沙——唔要砂糖、走奶——唔要牛奶,喺食货暗号入面,“飞”、“走”代表“唔要”嘅意思,所以唔要冰,可以讲成“飞冰”,唔要青菜,就係“走青”。
9
茶走
一般想奶茶甜,会加砂糖,“茶走”就係唔加砂糖,用炼奶代替淡奶令到奶茶有淡淡嘅甜味,而且加咗炼奶嘅奶茶会更加丝滑,识饮嘅mark低暗号啦~
10
滚水蛋
当你以为係“水煮蛋”嘅时候,人地就知你唔係自己人啦~“滚水蛋”係指,喺装住滚水嘅杯入面,打一只生鸡蛋,再加适量糖搅拌。
11
细蓉
“细蓉”係细碗竹升云吞面嘅传统叫法,而且係面kum住云吞嘅先可以叫“蓉”,同理,大碗就叫“大蓉”~
13
捞丁
好多茶餐厅嘅餐蛋面都会用比较便嘅即食面,口感唔好,于是就 可以拣另一种面“出前一丁”,简称“ 丁”,而“捞”就係搅拌,通产可以加白汁、芝士汁一起捞~
14
打烂
因为炒饭嘅制作方法,就係将煮好嘅白饭炒散,所以就叫【打烂】!
15
春
因为鸡蛋粤语入面可以叫成“鸡春”,所以就将“太阳蛋、双蛋、熟蛋”叫成“生春、孖春、熟春”。例句:“唔该,碟头饭加孖春!喺度食!”
16
飞边
好多人唔中意面包外面层皮,可以叫“飞皮”,叫厨师切咗佢,而「烘底」就係将白面包烤成多士,会比较香脆~
17
加色
如果即点即叫嘅汤粉面要求加牛腩汁之类嘅酱汁, 暗号就係”加色“。可以令本身比较淡嘅汤底更加香浓~
18
加底
如果觉得点嘅饭/面分量唔够,就可以叫“加底”,加多一份饭或者面,肠粉都可以加底既~通常加底嘅肠粉会比较斋,所以可以选择加多只蛋,落单可以讲:“唔该,鸳鸯肠加底加旦~”
呢啲食货暗号大家知几多先
如果有小编未提到嘅
记得留言同我地讲啊,大家同声同气自己人啊嘛~